爭人錢最好係唔洗還,平民想唔還就走佬,皇帝想唔還就係錢到做手腳,幾千年黎都一樣,只係人類文明左,手段就複雜左
由古時羅馬將金銀幣重鑄降低成色,到三國時期劉備搞直百錢,再到日本江戶時期所謂既元祿貨幣改革,都係一撚樣
成色既問題,就係比如個金幣本來係九九金,拎去市場可以換10隻牛,後來皇帝唔夠錢洗,就將d金幣溶左佢重新鑄過,但就溝其他銅呀鐵呀咁,成色低左自然冇咁值錢,溝淡左果部分就落皇帝自己個袋,呢樣就係鑄幣稅
有紙幣後唔洗搞咁多野,印錢就搞掂.但我地可同時發現,凡係以為抽鑄幣稅就過到骨既皇朝,最後都係咸家剷,因為搞搞下最後實係惡性通脹令平民暴動
08年後美國金融切柒 + 排雲掌,有兩個層面,其一係因為伯南克係專研究三十年代大蕭條,大蕭條原因係貨幣緊縮而出現流動性危機,再而貿易戰再緊縮咁惡性循環.通縮部分唔淨止係政府控制既銀根,仲牽涉埋影子銀行問題,即非傳統銀行之間既拆借崩潰形成通縮,道力係隨時大過政府印錢,所以伯南克一開波就話要坐直升機派錢,因為根本冇人知條數實際係幾多,唯有先用錢浸到上心口先再慢慢觀察.影子銀行拆借通縮部分呢到暫時唔講住,但如本身有做生意經驗既應該明
其二就當然係抽鑄幣稅,但歷史已證明左印錢最後係咸家剷,點搞?仆街美國佬就諗到,只要唔係得自己印,全世界一齊印分薄左就冇咁大鑊.只要全世界一齊印,通脹黎時所有銀紙後面加個零,人工加個零,全世界就冇事發生過,但美國欠人既債就還少九成
可惜美國既陰毛呀水都知,有個國家就硬係唔聽話唔跟,仲到特登調轉玩緊縮,果個就係德國.讓我地回顧一下前面三篇提及現時棋局內既情況
首先,有人唔聽話,美國就叫日本開拖,但帶黎既問題係,日圓貶值,美債就要仆街
其次,叫英國係後欄點火,美日英成立新邪惡軸心,順手要大不列顛同系國加拿大,澳洲,紐西蘭企埋一齊,鐵索連環.同時,好似淝水之戰咁,意大利係前面大叫好混亂,搞到人以為後面都好混亂,睇你歐盟仲緊唔緊縮,順手封你後路跟住唔好同自己爭食
其三,面對咁既情況,共產黨要招架之餘仲想執雞,醒起光明頂密室本秘笈,使出乾坤大挪移第一重+第二重,為左修成第二重,所以要推出「共產黨有野益你」模式,長遠希望搶灘爭美元莊家個位黎做,咁第日就可以同人講自己金盤洗手撈番正行
其四,七國咁亂之際,有個國家唔聲唔聲係到升值,就係美金
面對咁既情況,美國終於要出動絕學「萬劍歸宗」
美國每一著都係要頂死你,共產黨想執雞用乾坤大挪移,美元就升值,睇你共產黨比既著數多定美國比既著數多,2013年乃爭利既時代!
為左出動萬劍歸宗美國既亦鋪墊好晒,廠佬呢幾年已經陰d陰d搬番去美國做,準備made in usa;國內大量用生質燃料溝石油,油價大上大落對自己影響減低;而家黎搞頁岩氣,中東撤軍就等你地自己去揹睇場紮馬條數,需要時仲輸出埋天然氣比你收錢
而最緊要既當然係,當日圓貶值帶黎既美債仆街,係可以用美金升值黎抵銷.美債仆街,但孳息率高,再加埋美金趨勢向上,外面七國咁亂,你要定唔要?
捉棋就係咁,你呢步想食人時,人地防守兼反制,你就要推埋去反反制.當你反反制後人地又要頂住再反反反制.共產黨想人民幣國際化但人地睇住你黎打,唯一出路就只有用封存百年既武林絕學 - 《葵花寶典》
轉自 yahoo blog - Tregunter2012
